الإعلانات

اهو دا اللى صار

الإعلانات

واهو دا اللى صار

 

احكيلك ..

الموهبة رزق .. والنجاح رزق .. والرزق الكبير انك تسيب أثر ايجابى عند الناس .. حاجه كده تعيش بعد انت ما تموت ..

لكن الحقيقة ان أهل الحب أحياء ..

 

الحب ..

الحب هو دا السر ..

كنت فى كرب عظيم ، والشوارع وحش بياكل الغلابه والمجروحين ، ولقيت خواجه من آخر الدنيا جاى يتعلم القرآن ، وكان مع ربنا زى السبحه فى ايد العابد ..

 

وكانت صلاة الفاتح ..

وكان الحب ارث الموعودين من أيام سيدى آدم عليه السلام ..

بيتنقل من قلب لقلب ومن رحم لرحم ..

وعرفت عبد الرحيم كمال ..

وعاش الخواجه عبد القادر ..

 

وقابلت ونوس ..

والخناقه اللى دايره مابين الحب والكِبر ..

وانتصر الحب وعاش ..

و ونوس كان متغاظ ..

 

ورجعت تانى اتوه فى الحياه مجروح غريب ..

والقلب متشوق لطبطبه ربانى ..

ومن بعيد ..

القانون بيلعب اهو دا اللى صار ..

وسكت الكلام ..

 

** على بحر

 

القلب اللى متشعلق بالجمال والخير ، العود اللى كل همه يشوف ضحكة على شط مصر منوره البحر كله ، العاشق الأفلاطونى ،بستان الموهبه اللى بتدبل قدام سطوة المحسوبيه ومتطلبات السوق ، العشه المنسيه على الشط  اللى بيرمى فيها كسران خاطره كل يوم وليله ..

يا هل ترى كام واحد فينا هو على بحر ؟؟

 

**خديجه هانم

حارس المعبد اللى دبح قلبه قدام عنيه ، ويصحى كل يوم يتلو الترانيم ويطمن على وجود المأساه على حيطان المعبد وينام تانى ، وعاش المعبد ، وعاشت مأساة خديجه هانم على الجدران ..

 

**جونى منصور

قلت لحضرتك ان الحب رزق ، وجونى عاشق حقيقى ، للبلد عاش وفى البلد مات ،ياهل ترى ايه اللى وصل حفيده انه يكون متطرف القلب والعقل ؟؟

 

**يوسف الأول

الطفل دايما مالوش عمر ، أصدق مافى الطفل هى مشاعره ، يوسف بيه نوار كان طفل لابس بدله وكرافت ،كان نفسه يدخل الشمس قصر خديجه هانم ..

 

**ندره

الفلاحه الصعيديه اللى اكدت ليا ان الجنه ممكن تشوفها كل يوم فى وجه امرأه ..

 

** سلمى

البنت المصريه اللى طمنتنى ان بالحب ممكن نواجه الواقع الكئيب ، وان السبحه مش ديكور ، السبحه اشاره لمدد وطريق ..

 

**الزهار

القلب النقى اللى غلبته الانا والكبر ، مثال لشريحه كبيره تحسب أنفسها تحسن الصنع ، الشريحه دى كِيف هتقابل حضرة سيدنا النبى وهتقوله ايه ؟؟

 

**البساطى

القلب الغلبان اللى صاحبه رماه على ناصية الطريق وداس عليه ، صنايعى حياه ،صالح نفسه مع فقه الواقع ، وبصق فقه الحقيقه .

 

**البساطى الحفيد : ابن احسان بيه الحقيقى ، عاوز القصر ،عاوز الأصل ، شوف كام واحد الوقتى نفسه فى أصل ؟

 

**فاروق بيه ابو سلمى : الغول ، النقص ، القلب التعبان من سنين ، خناقة الأصل والفصل ..

 

**يسا : عاوز تحسب عمر اسكندريه ؛ شوف يسا ..

 

**أصداف : حزين لاجلك ياصدف ، قلبك فى ناحيه ، عمرك فى ناحيه ، رغباتك فى ناحيه ، فيلم حياتى بنشوفه كل يوم، فى الشارع وفى المظاهر الاجتماعيه المزيفه،.

 

احكيلك ..

**عم زكريا كان زعلان اوى من الراديو ،راح يدعى عليه ،وقال النهارده : مات ابوزيد الهلالى ..

*ياعم زكريا هى الحكايه بتموت ؟؟

واهو دا اللى صار ..

 
الإعلانات

هذا المحتوى يعبر فقط عن رأي صاحبه و بما أن أبواب نت فضاء حر فنحن لسنا بالضرورة على علم بالمضمون فالرجاء إبلاغنا عن أي تجاوز.

اترك تعليق

Please Login to comment
إنشاء حساب جديد
تسجيل الدخول عن طريق مواقع التواصل الاجتماعي

الإسم (مطلوب)
تغيير كلمة المرور